Glæsileg félagsmiðstöð í Spennistöðinni

pennistöðin við Austurbæjarskóla hefur verið opnuð á ný eftir endurbætur sem gerbreyta allri aðstöðu þar til frístundastarfs. Þar er nú búið að skapa glæsilega aðstöðu fyrir börn og ungmenni. Húsið er hugsað sem vettvangur fyrir íbúa og meðal annars hafa Íbúasamtök Miðborgar staðið fyrir ýmsum viðburðum í húsnæðinu og haldið þar stjórnarfundi.

Breytingarnar felast í því að byggt hefur verið loft yfir hálfu aðalrýminu. Þar hafa verið innréttuð nokkur stór herbergi sem nýtast vel fyrir margs konar starfsemi. Þá hafa verið settir gluggar á rýmin sem hleypa inn birtu auk þess sem aðstaða starfsmanna hefur verið bætt.

Spennistöðin var fyrst tekin í gagnið 2014 en henni var fyrst og fremst ætlað að verða félagsmiðstöð fyrir börn og unglinga í Miðborginni og fjölnota rými til kennslu í Austurbæjarskóla. Þar að auki var henni ætlað að efla félagsauð með því að bjóða samtökum og íbúum í Miðborginni að hafa viðburði og fræðslu í húsnæðinu.

Skóla- og frístundasvið rekur Spennistöðina en félagsmiðstöðin 100og1 er rekin undir merkjum frístundamiðstöðvarinnar Tjarnarinnar. Sérstak húsráð, skipað forstöðumanni 100g1, fulltrúum kennara, ungmenna, Tjarnarinnnar og íbúasamtakanna er ráðgefandi um rekstur Spennistöðvarinnar.

„Aðstaðan er orðin verulega góð og verður mikil lyftistöng fyrir frístundastarf í hverfinu,“ segir Guðrún Kaldal framkvæmdastjóri Tjarnarinnar.

Hugmyndin að því að breyta húsnæðinu í félags- og menningarmiðstöð kom upphaflega af Betri Reykjavík en mikil umræða var þá í hverfinu á meðal foreldrafélags, stjórnenda og kennara Austurbæjarskóla, starfsmanna frístundamiðstöðvarinnar og íbúasamtaka Miðborgar um að mikil vöntun væri á sérstöku húsnæði fyrir frístunda- og félagslíf í hverfinu. Skóla og frístundaráð ákvað árið 2012 að breyta húsnæðinu í þessa veru.

Byrjað var að breyta húsinu 2012 og var það opnað frekar hrátt 2014. Endurbæturnar á húsnæðinu nú gjörbreyta þeirri aðstöðu til hins betra.

Í gær var rafmagnað Öskudagsfjör í Spennistöðinni og fjölmargir litu inn í heimsókn en boðið var upp á léttar veitingar og hnausþykka súkkulaðitertu í tilefni dagsins.

Næstkomandi laugardag, 9. mars, verða Íbúasamtök Miðborgar með opið hús í Spennistöðinni á milli kl. 13-15 þar sem íbúar geta skoðað endurbæturnar