Tjörnin hlýtur tvenn hvatningarverðlaun skóla- og frístundaráðs Reykjavíkur!

Tjörnin hlýtur tvenn hvatningarverðlaun skóla- og frístundaráðs Reykjavíkur!

 

Í dag var uppskeruhátíðin Höfuð í Bleyti haldin fyrir frístundahluta skóla – og frístundasviðs Reykjavíkur. Þar koma starfsmenn frístundamiðstöðva saman og hlusta á áhugaverð erindi og kynna framsækin verkefni. Á sama tíma veitir skóla- og frístundaráð þeim verkefnum viðurkenningu sem það telur að skari fram úr. Starfseiningar Tjarnarinnar voru alls með 18 tilnefningar og í ár voru það tvö verkefni á vegum Tjarnarinnar sem að hlutu verðlaun en það er verkefnið Hinsegin félagsmiðstöð og verkefnið Amicos non Ficta.

Hinsegin félagsmiðstöð Tjarnarinnar og Samtakanna 78 hefur verið rekin undanfarin tvö ár en hún er fyrir unga hinsegin einstaklinga, þau sem hafa áhuga á hinsegin málefnum, eru í hinsegin pælingum eða vilja vera stuðningur eða hvatning fyrir ungmenni sem tengja við hinsegin málefni. Tjörnin útvegar fagmenntaðan starfsmann til þess að sjá um utanumhald starfsins, þjálfa sjálfboðaliða, veita faglega innsýn, þróun þess og framtíðarsýn. Meðal þess sem samstarfið hefur leitt af sér er aukin ásókn yngri hinsegin ungmenna á aldrinum 12-17 ára í sarfið. Það hefur aukið samstarf við aðrar félagsmiðstöðvar í Reykjavík sem og aðra hagsmunaaðila ungmenna. Áhugasömum starfsmönnum í félagsmiðstöðva Reykjavíkurborgar hefur einnig staðið til boða að nýta sér skipulagt reynslunám í Hinsegin félagsmiðstöð Unglinga Samtakanna 78. Með því hefur þekking starfsfólks á þessum málaflokki aukist, samskipti milli félagsmiðstöðva aukist, einstaklingar hafa fengi stuðning í starfi Hinsegin félagsmiðstöðvarinnar og starfsfólk fengið að upplifa starfið að eigin raun. Yfir 40 starfsmenn hafa nú þegar nýtt sér reynslunámið. Hrefna Þórarinsdóttir tók á móti viðurkenningu.

Amicos non Ficta er mikilvægt verkefni sem verður til sem svar við umræðu í samfélaginu um karlmennskuhugmyndir og samskipti kynjanna. Hópur stráka í 10.bekk hefur í vetur unnið saman í einstöku hópastarfi í félagsmiðstöðinni Frosta. Strákarnir hafa undir leiðsögn starfsmanns unnið að því að dýpka sig í tilfinningaumræðu, einlægni og sönnum vinskap samhliða því að vinna að ýmisskonar sköpun. Hópurinn kallar sig Amicos non Ficta en nafnið samanstendur af orðunum vinir og einlægni en hópurinn valdi þetta nafn. Að nota sköpun sem grundvöll fyrir samtal getur gefið góðar niðurstöður og opnar á munnlega tjáningu ásamt tjáningu í verki án orða. Hópurinn hefur skapað saman tónlist, unnið að smíðaverkefnum, prentað á föt og búið til skart. Strákarnir hafa myndað góðan vettvang fyrir samræðu, tjáningar á tilfinningum og jákvæð samskipti. Þórður Jörundsson tók á móti viðurkenningu.

Einnig voru önnur framsækin verkefni kynnt og frá komu nokkrar kynningar frá Tjörninni

Styrmir Reynisson forstöðumaður á frístundaheimilinu Selinu fjallaði um 21. aldar foreldrasamskipti. Foreldrar 21. aldarinnar vilja geta séð hvernig dagur barnsins þeirra er með aðstoð nútíma tækni. Frístundaheimilið Selið var með tilraunaverkefni til að færa foreldrasamskipti Selsins inn í 21. öldina.

Stefán Gunnar Sigurðsson úr félagsmiðstöðinni Frosta fjallaði um Í sjöunda himni – jákvæð samskipti í 7. Bekk. Félagsmiðstöðin Frosti hefur undanfarið verið að vinna í samstarfi við Vesturbæjarskóla að því að bæta liðsheild í 7. bekk. Frosti fékk þróunarstyrk til að vinna verkefnið sem felst í því að styrkja hópinn sem heild, efla samkennd og styrkja jákvæð samskipti með umræðum, hópefli, fræðslu og áhugaverðum verkefnum.

Rúnar Örn Marinósson var með erindi um Roleplay klúbb Frosta. Klúbburinn hittist einu sinni í viku og spilar Dungeons & Dragons. Auk þess skipuleggur hópurinn viðburði á borð við Harry Potter LARP (Live action role playing). Klúbburinn er frábær vettvangur fyrir einstaklinga sem taka sumir ekki mikinn þátt í öðru félagsstarfi til að kynnast öðrum sem deila svipuðum áhugamálum og jafnvel mynda þar sterk félagsleg tengsl.

Eyrún Eva Haraldsdóttir forstöðukona í frístundaheimilinu Undralandi var með erindi um Fjölmiðlalæsi og börn. Hvaða máli skiptir fjölmiðlalæsi á frístundaheimili? Fjallað var um mikilvægi þess að efla fjölmiðlalæsi barna í gegnum frítíma þeirra og hvað frístundaheimilið Undraland (í samstarfi við önnur frístundaheimili Tjarnarinnar) hefur gert til að framfylgja því.

Dýrleif Sjöfn Andradóttir og Una Margrét Lyngdal Reynisdóttir unglingar úr félagsmiðstöðinni Frosta voru með erindi um Gáruna sem er unglingatímarit um líkamsvirðingu og sjálfsást. Hópur unglinga í félagsmiðstöðinni Frosta hefur undanfarna mánuði unnið hörðum höndum að því að setja saman tímaritið Gáruna sem verður gefið út í maí og fjallar um líkamsvirðingu, sjálfsást og samfélagsmiðla. Tilgangur Gárunnar er að varpa ljósi á þessi málefni og birta leiðir til þess að horfa á samfélagsmiðla með gagnrýnum augum. Það gera unglingarnir með fjölbreytt-um greinum, viðtölum, ljósmyndum og teikningum sem segja öll sögu þess að læra að elska sjálfan sig óháð samfélagslegum kröfum, á sinn eigin hátt. Hluti hópsins segir hér frá hugmyndavinnunni og ferlinu.

Bergþóra Sveinsdóttir forstöðumaður í félagsmiðstöðinni 105 fjallaði um Yung Sluts.

Yung Sluts Yung sluts er samstarfsverkefni Feministafélags 105 og Druslugöngunnar og megin tilgangur þess að færa umræðu um kynferðisofbeldi inn í grunnskólana. Haldinn er viðburður yfir sumartímann sem þjónar þeim tilgangi að gera unglingum kleift að koma og kynna sér tilgang Druslugöngunnar, hvað það þýðir að skila skömminni heim, kynna sér málaflokkinn og versla varning fyrir Druslugönguna. Unglingarnir upplifðu sig ekki sem markhóp Druslugöngunnar og vildu skapa vettvang fyrir umræðu um kynbundið ofbeldi á jafningjagrundvelli þar sem þeir hafa tækifæri til að auka sína þekkingu á málaflokknum og möguleikann til að bera boðskapinn lengra. Yung sluts skapar vettvang fyrir ungt fólk til þess að koma saman og sýna samstöðu í baráttunni gegn kynferðisofbeldi. Haldið sumarið 2016 og 2017.

Við í Tjörninni eru einsaklega stolt og þakklát fyrir allan þann mannauð sem að vinnur að því að efla og þroska börn og unglinga í Vesturbæ, Miðborg og Hlíðar og óskum þeim sem hlutu verðlaunin hjartanlega til hamingju.