Um Frostheima

http://shs.is/index.php/fraedsla/roskun-a-skolastarfi/

Aðgerðaráætlun barnastarfs 2022-2023 Frostheimar

Foreldrahandbók Frostheima

Almennar upplýsingar um frístundaheimilið Frostheima fyrir foreldra og aðra áhugasama

Kæra foreldri/forráðamaður

Í þessari handbók er að finna nytsamlegar upplýsingar fyrir þig og barnið þitt varðandi frístundaheimilið. Það er mikið af upplýsingum sem að foreldrar þurfa að meðtaka í byrjun skólaárs og því tilvalið að hafa allar upplýsingar um frístundaheimilið á einum stað. Við hlökkum til að vinna með ykkur og börnunum ykkar í vetur og vonum að handbókin komi að góðum notum.

Kafli 1. Hvað er frístundaheimili?

Frístundaheimilið sem uppeldisstofnun

Undanfarinn áratug hafa frístundaheimilin í Reykjavík verið að treysta sig í sessi sem mikilvæg viðbót við skóladag barna á yngsta stigi grunnskóla.Þátttaka mælist sífellt meiri í starfi frístundaheimilanna og sérstaklega eykst þátttaka barna í eldri 3. og 4. bekk jafnt og þétt eftir því sem árin líða.

Verkferlar og skipulag

Samstarf við foreldra og aðrar uppeldisstofnanir.Við leggum mikið upp úr því að geta þjónustað barnið sem best þar sem það er statt hverju sinni. Til þess að okkur takist leggjum við okkur fram við að vera í góðu samstarfi við foreldra og aðra sem koma að degi barnsins, svo sem skóla, íþróttafélag og þjónustumiðstöð.Við bjóðum öllum foreldrum upp á formlegt foreldraviðtal einu sinni á ári, en auk þess er verkefnisstjóri við teymis- og skilafundi um einstök börn óski foreldra eftir því. Foreldrar geta nálgast verkefnisstjóra alla morgna milli kl. 9 og 12 í síma 411-5740 eða 695-5083. Einnig má panta viðtal hjá verkefnisstjórum á sama tíma.Við biðjum foreldra hins vegar að halda símhringingum í frístundaheimilið á starfstíma þess í algjöru lágmarki, enda eru allir starfsmenn uppteknir á vettvangi í starfi með börnunum þá.

Almennar upplýsingar um frístundaheimili

Frístundaheimilið Frostheimar hefur verið starfrækt við Melaskóla, Grandaskóla og Vesturbæjarskóla síðan í janúar árið 2010. Á þessum árum hefur frístundaheimilið verið í sífelldri sókn og starfsfólk unnið hörðum höndum við að þróa innra starf frístundaheimilisins. Nafnið Frostheimar var valið af börnum sem voru á frístundaheimilinu fyrsta starfsárið. Miðað er við 16 börn í 3.-4. bekk á starfsmann. Þessi viðmið um barngildi á starfsmann ákvarða hvernig við getum við tekið börnin inn á haustin og ef fjöldi umsókna fer fram yfir fjölda starfsmanna sem tekist hefur að ráða getur myndast tímabundinn biðlisti á haustin.Börn í 1. bekk og börn með sérstakar aðstæður eru í forgangi þegar sótt er um dvöl í frístundaheimili skv. ákvörðun borgarráðs. Því ráðleggjum við foreldrum að skila umsókn inn fyrir barnið eins fljótt og kostur er, en ávallt er opnað fyrir umsóknir fyrir næsta skólaár í febrúar.

Opnunartími – Frístundaheimilið opnar um leið og venjulegum skóladegi lýkur og er opið frá kl.13:40 – 17:00. Börnin í Melaskóla og Vesturbæjarskóla eru sótt í skólann og fá far með starfsmönnum og rútu yfir í Frostheima. Grandaskólabörn ganga sjálf yfir götuna. Í lok dags er boðið upp á fylgd í Vesturbæjarskóla og Melaskóla og köllum við þennan hóp Þrammara. Þau leggja af stað úr Frostheimum kl.16:30 að skólalóðinni og þaðan ganga þau svo sjálf áfram heim.

Gjald– Það kostar 13.413  kr. að vera 5 daga í viku á mánuði. Foreldrum býðst að fá gíróseðil sendan heim eða að borga með Visa/Euro raðgreiðslum. Gjaldið er ávallt innheimt eftir hvern mánuð. Ef foreldrar vilja segja upp plássinu þá er mikilvægt að gera það fyrir 15. hvers mánaðar og tekur uppsögnin þá gildi mánaðarmótin á eftir.Hægt er að skrá barn í hlutadvöl í frístundaheimili og tekur gjaldið þá mið af nýtingunni. Nánari upplýsingar um gjaldskrána má sjá hér: http://reykjavik.is/gjaldskrar/fristundaheimili-gjaldskra

Hressing – Það fyrsta sem börnin gera þegar þau koma í Frostheima er að fá sér hressingu eða fara í útiveru. Hressingin kostar 3.872 krónur á mánuði sé barn 5 daga í viku og er gjaldið innheimt með dvalargjöldum í frístundaheimilinu. Þegar að börnin hafa fengið sér hressingu og farið í valstund þar sem þau velja sér viðfangsefni dagsins hefst formleg dagskrá. Mikið er lagt upp úr því að starfsfólkið sitji hjá börnunum þegar verið er að borða. Við viljum sýna fordæmi varðandi frágang í matsalnum og kenna börnunum að ganga vel um frístundaheimilið sitt, auk þess sem við vitum vel að maður er manns gaman og mikið af skemmtilegum og góðum samskiptum eiga sér stað við matarborðið.

Viðburðadagatal og dagskrá– Dagatal Frostheima er ávallt aðgengilegt foreldrum, hvort sem það er á heimasíðunni okkar, www.frostheimar.tjornin.is, á Foreldrasíðu Frostheima á facebook eða upp á upplýsingatöflu. Dagskrá Frostheima á hverjum degi má sjá á Valtöflunni í anddyrinu og á upplýsingatöflunni inni í Kaffiheimi. Dagskráin er samansett af fjölbreytileika og skemmilegum tómstundum. Leitast er eftir því að hafa dagskrána þannig uppbyggða að í bland sé boðið upp á skipulagt starf og frjálsan leik. Þar sem börnin hafa setið í skólastofunni allan daginn er nauðsynlegt að þau fái sinn skerf af frjálsum tíma. Útisvæðið hjá Frostheimum er ekki mjög gott en við erum svo heppin að skólalóð Grandaskóla er hinu megin götunnar og nýtum við okkar hana auk rólóvalla í herfinu, fjörunnar og fleiri grænna svæða sem vesturbærinn býr að. Skipulögðum dagskráliðum lýkur að mestu í kringum kl.16:20, þar sem að börnin eru farin að tínast heim á þeim tíma.

Heilir dagar – Á þeim dögum þegar hefðbundið skólahald liggur niðri, svo sem á starfsdögum kennara, í jóla- og páskafríum og öðrum frídögum í skólanum er boðið upp á þjónustu allan daginn í frístundaheimilinu. Hins vegar er ekki opið í vetrarfríum skólans. Á þessum dögum er opið í Frostheimum frá 8:00 – 17:00. Greiða þarf aukalega fyrir þjónustu fyrir hádegi þessa daga, en sótt er um lengda viðveru á heilum dögum inni á Rafrænni Reykjavík. Rík áhersla er lögð á það að foreldrar láti vita hvort barn mæti eða ekki þá daga sem skipulagt skólastarf liggur niðri, óháð því hvort nýta á viðbótarvistun að morgni eða fast pláss eftir hádegi svo best gangi að manna vaktirnar og skipuleggja dagskrána. Athygli er vakin á því að ekki er tekið við óskráðum börnum á heilum dögum. Á heilum dögum er tilvalið að fara með börnin í ferðir. Sendir eru út sérstakar rukkanir fyrir heila daga tvisvar á ári, í janúar og júní.

Aðstaðan– Við erum svo heppin í Frostheimum að hafa tveggja hæða húsnæðið út af fyrir okkur auk fimm húsa á baklóðinni. Skiptist húsnæðið í eftirfarandi svæði: Kaffiheim en þar snæða 3. bekkingar hressingu auk þess sem við nýtum svæðið til þess að spila borðspil en mikil spilamenning er í Frostheimum. Listaheimur sem við notum undir listasmiðju og aðra skapandi vinnu. Kubbaheimur þar sem einingakubbar ráða ríkjum og Legoheimur þar sem allt snýst um legokubba og frjálsar byggingar með þá. Teiknihorn þar sem skapandi vinna með blýanta, tréliti og tússliti fer fram auk þess sem við erum með Perluheim þar sem Hamaperlur og sköpun með þeim ræður alfarið ferðinni . Á efri hæð hússins erum við með Íþróttaheim en þar fer fram skipulögð dagskrá með hinum ýmsu leikjum, Kósíheim og Glerheima þar sem við erum með sjónvarp, fótboltaspil og þangað er hægt að koma og lesa og hlusta á sögur. Eldheimar eru svo eitt þeirra húsa sem við fengum haustið 2013 en þar hafa 4. bekkingar aðsetur, eiga sína fatasnaga og snæða þar hressingu og fara í valstund. Í Eldheimum er að mestu bakað. Jarðheimar eru aðsetur alls kyns leikfanga og sjónvarps en þar sýnum við bíósýningar auk þess sem bókasafn Frostheima á þar svæði. Loftheimar eru aðsetur alls föndurs en þar er reglulega vinabandagerð, skartgripagerð og alls kyns skemmtilegt föndur í gangi. Jökulheimar geyma skrifstofu okkar forstöðukvenna auk svæðis þar sem hægt er að leika sér frjálst með playmobil, silvanian, pússl og kaplakubba. Sólheimar eru aðsetur leiklistaklúbbs en þar má kenna ýmissa grasa eins og búninga, ýmiss heimilistæki og tól, allt sem þarf í góðan hlutverkaleik

Fréttabréf, heimasíða og tölvupóstur

Upplýsingaflæði til foreldra er okkur mjög mikilvægt. Við gefum út fréttabréf, höldum úti heimasíðu og sendum alltaf mánudagspistla, sem og aðra tilfallandi tölvupósta til foreldra. Atburðardagatal fyrir veturinn og aðgerðaráætlun frístundaheimilisins er aðgengilegt á heimasíðu í upphafi vetrarstarfs.

Fréttabréf – Við gefum út fréttabréf einu sinni í mánuði. Þar er að finna upplýsingar um hvað hefur verið að gerast og hvað er á döfinni í frístundaheimilinu. Reynt er að virkja bæði börn og almenna starfrsmenn sem mest við gerð fréttabréfsins og á það að veita foreldrum og öðrum áhugasömum góða innsýn inn í daglegt líf og menningu frístundaheimilisins. Fréttabréfin er hægt að nálgast í foreldrahorninu okkar í anddyri Frostheima, á heimasíðunni og á Foreldrasíðu Frostheima á facebook.

Heimasíðan – Slóðin á heimasíðuna er www.frostheimar.tjornin.is . Þar er að finna mikið upplýsingaflóð um starfsfólk, innri starfsemi, myndir úr starfinu og fréttir. Heimasíðan er uppfærð að jafnaði tvisvar sinnum í viku.

Tölvupóstur – Reglulega senda verkefnastjórar tölvupóst til allra foreldra, ýmist um það sem er á döfinni eða til að koma áríðandi skilaboðum á framfæri. Mjög mikilvægt er að foreldrar gefi upp rétt netfang við umsókn í Rafrænni Reykjavík og ágætt ef foreldrar skoða það póstfang reglulega. Hægt er að senda póst á netfangið frostheimar@reykjavik.is .

Séreinkenni fyrir frístundaheimilin í Vesturbæ:

Kassabílarallý – Hefð hefur skapast fyrir því að halda kassabílarallý á vorin á milli frístundaheimila Tjarnarinnar þar sem keppt er í mesta bróðerni um það hver eigi hraðskreiðasta bílinn, flottasta bílinn, besta stuðningsliðið og snörustu stafsmennina. Hvert frístundaheimili er með sinn einkennislit og einkennislitur okkar er rauður.Öllum foreldrum er frjálst að mæta og taka þátt í gleðinni með okkur.Önnur sameiginleg verkefni frístundaheimilanna eru:

Jólamarkaður – Til styrktar RKÍ eða Unicef og er haldinn ár hvert um miðjan desember í sal Frostaskjóls. Þá hafa börnin í frístundaheimilum Frostaskjóls föndrað og útbúið alls kyns vörur og varning sem þau selja foreldrum og velunnurum til styrktar RKÍ.

Barnasáttmálavika- Er þemavika sem haldin er á hverju ári í kringum afmæli Barnasáttmálans þann 20. nóvember. Þá einbeitum við okkur sérstaklega að réttindum barna og vinnum skemmtileg og fræðandi verkefni.

Mannréttindavika- Er þemavika tileinkuð mannréttindum og höldum við eina slíka viku árlega í marsmánuði þar sem við kynnum okkur hin ýmsu verkefni tengd mannréttindum og veltum upp spurningum eins og hvað eru mannréttindi?

Kafli 2. Markmið frístundaheimilisins og gildi

2.1 Markmið og gildi fyrir veturinn

Við höfum sett okkur ákveðin markmið og gildi sem við vinnum eftir. Tilgangurinn er að tryggja að starf frístundaheimilisins sé faglegt í alla staði. Við viljum að markmiðin séu sýnileg foreldrum og börnum allan veturinn. Gildi Frostheima eru eftirfarandi:

 Gildi Frostheima

Kafli 3. Starfsfólk

Starfsmannahópurinn samanstendur af tveimur verkefnisstjórum í fullu starfi, aðstoðarverkefnisstjóra í fullu starfi og starfsmönnum í hlutastarfi, sem eru í allt frá 20-50% starfshlufalli.

Forstöðukonur Frostheima eru Dórothea Ævarsdóttir og Heba Agneta Stefánsdóttir. Daglegur vinnutími þeirra er frá 9 – 17. Flesta morgna er hægt að ná tali af okkur á skrifstofunni. Hægt er að ná í forstöðukonur í síma 411-5740 alla morgna. Sérstaklega er mælt með því að foreldrar hafi samband við okkur fyrir hádegi ef áríðandi mál koma upp. Mjög erfitt getur reynst fyrir starfsfólk að taka á móti fyrirspurnum á milli 13:30 – 17:00, þar sem nóg er um að vera með börnunum. Ef foreldrar vilja panta viðtalstíma hjá verkefnastjóra þá er það alveg sjálfsagt. Best er þá að hafa samband tímanlega og panta tíma.

Dórothea: 695-0259

Heba Agneta: 695-6626

Kafli 4. Nytsamlegir puntkar

Umsókn og uppsögn – Umsóknir eru sendar inn í gegnum Rafræna Reykjavík og taka gildi um leið og forstöðukona samþykkir umsóknina. Uppsagnir þurfa að berast verkefnastjóra skriflega fyrir 15. hvers mánaðar.

Hvenær er best að hafa samband – Mjög mikilvægt er að hringja ekki í síma Frostheima á milli 14 – 17:00, nema um neyðartilvik sé að ræða. Það er sjálfsagt að hringja á milli 9 – 13:30 eða hafa samband í gegnum tölvupóst.

Kostnaður – Það kostar 13.413 kr. að vera 5 daga í viku (sjá nánar gjaldskrá á síðunni). Á heilum dögum kostar 2.013 kr. að vera allan daginn.

Heilir dagar – Á heilum dögum er oftast farið í ferðir yfir daginn. Ýmist er farið í sund, keilu eða á aðra spennandi staði. Heilir dagar eru allir frídagar í skólanum, fyrir utan þá sem eru rauðir á dagatalinu. Mikilvægt er að börnin komi með viðeigandi fatnað og nægilega mikið nesti yfir daginn.

Hressing – Við í Frostheimum sjáum sjálf um síðdegishressingu. Foreldrar geta skráð börnin í síðdegishressingu eða valið að börnin komi sjálf með nesti með sér. Verð fyrir síðdegishressingu er 3.872 kr. Á mánuði sé barnið 5 daga í viku.

Hvenær er lokað í Frostheimum – Það er aðeins lokað í Frostheimum á rauðum dögum á dagatalinu. Þ.e.a.s. á þeim dögum þegar að allt er lokað, eins og jóladag, nýársdag, skírdag, föstudaginn langa o.s.frv. Einnig erum við með tvo starfsdaga á ári, einn á haustönn og einn á vorönn þar sem Frostheimar loka, óháð skóladagatali skólanna í hverfinu. Allir dagar sem er lokað hjá okkur eru auglýstir með góðum fyrirvara.

Frístundakortið – Markmið og tilgangur Frístundakortsins er að öll börn og unglingar í Reykjavík 6-18 ára geti tekið þátt í uppbyggilegu frístundastarfi óháð efnahag eða félagslegum aðstæðum. Frístundakortinu er ætlað að auka jöfnuð í samfélaginu og fjölbreytileika í iðkun íþrótta-, lista- og tómstundastarfsemi. Meginskilyrði félaga sem gerast aðilar að Frístundakortinu er að starfsemin sé á forsendum uppeldislegar gilda og forvarna í víðum skilningi. Starfsemin fari fram undir leiðsögn hæfra starfsmanna og leiðbeinanda sem hæfir starfi með börnum og unglingum. Styrkhæf starfsemi þarf að vera í 10 vikur samfellt hið minnsta. Styrkurinn er kr. 25.000 á barn á ári en ekki er um beingreiðslur til forráðamanna að ræða, heldur hafa þeir rétt til að ráðstafa tilgreindri upphæð í nafni barns síns til niðurgreiðslu á þátttöku- og æfingagjöldum. Heimilt er að nýta styrkinn til niðurgreiðslu fleiri en einnar greinar en þó ekki fleiri en þriggja á hverri önn. Annirnar eru vorönn 1. janúar-31. maí, sumarönn 1. júní-31. ágúst og haustönn sem er 1. september-31. desember. Öll skráning og umsýsla Frístundakortsins fer fram með rafrænum hætti á Rafræn Reykjavík.

Gjaldskrá frístundaheimila má finna HÉR