Febrúar í Eldflauginni

Febrúar var tileinkaður þjóðsögum hjá okkur í Eldflauginni þannig að við hengdum upp nokkrar íslenskar þjóðsögur í Tunglinu sem börnin gátu lesið að vild og gerðum ýmislegt í smiðjum tengt þjóðsögum. Meðal annars var lesin lýsing á hinum ýmsu kynjaverum sem fyrirfinnast í þjóðsögum hérlendis og börnunum falið að setja myndir af þeim niður á blað. Börnin skoðuðu einnig þjóðsögur annarra menningarheima og gerðu sínar eigin.

Barnastarf Tjarnarinnar tók fjölmiðlalæsi fyrir eina viku í febrúar og Eldflaugin tók að sjálfsögðu þátt í því starfi. Í þeirri viku fræddumst við um beinar og óbeinar auglýsingar, gerðum fréttir og heimsóttum útvarpstöðin KissFM sem voru svo væn að taka á móti okkur og leyfa okkur að fylgjast með hvernig útvarp virkar.