Undraland: Fréttir, ævintýri og jólakór

Nú er klúbbastarf loksins komið í fullan gang hér í Undralandi. Fréttasmiðja, ævintýraspil og undirbúningur fyrir jólakór Undralands hófst í vikunni og voru krakkarnir að vonum spenntir.

Á mánudaginn fóru fréttamenn Undralands á stúfana og tóku viðtöl, bæði við krakka og starfsfólk, athuguðu hvað væri að gerast á svæðunum og komust að því að ekki er hægt að gera frétt um starfsmenn sem leyfa allt – þeir eru einfaldlega ekki til. Þeir komust einnig að best geymdu leyndarmálum Undralands, en allt þetta verður í Undralandsblaðinu sem kemur út á næstu vikum.

Ævintýraspilið gamla góða og undirbúningur fyrir kórastarf hófst á miðvikudag. Þegar kór er að fara af stað þarf að gefa út auglýsingu, en nokkrir krakkar tóku sig til og gerðu plakat þar sem jólakór Undralands er auglýstur. Hægt verður að skrá sig í jólakórinn fram í næstu viku og að skráningu lokinni hefjast æfingar. Mikil spenna er fyrir þessu verkefni.

Í næstu viku er síðan Barnasáttmálavika. Þá munum við ræða Barnasáttmála Sameinuðu þjóðanna við börnin og kynna þeim réttindi sín. Í lok vikunnar fer 2. bekkur í réttindagöngu og krefur háttsetta embættismenn um að munað sé eftir börnum og réttindum þeirra.