Leiklist og lagasmíð í Spennistöðinni
Vikuna 27.ágúst-1.júlí héldum við í Frístundamiðstöðinni Tjörninni leiklistar og lagasmíðanámskeið í Spennistöðinni fyrir börn á aldrinum 10-12 ára úr hverfinu.
Námskeiðinu var skipt upp í tvennt, við byrjuðum á leiklistinni fyrri part vikunnar þar sem farið var í allskonar leiklistartengda leiki, upphitunarleiki, hópeflisleiki, einbeitingarleiki og loks endað í spuna.
Seinni part vikunnar einbeittum við okkur að lagasmíðinni, horfðum á fræðslumyndbönd, hlustuðum á mismunandi tónlistarstíla og svo var hópnum skipt upp og farið var í að semja eftir þema og afraksturinn tekinn upp í stúdíóinu okkar. Þar fæddust popplög, barnalög, rokklög og kvikmyndatónlist. Einnig var farið í nokkrar textaæfingar og það var ótrúlega gaman að fylgjast með krökkunum gleyma sér í að skapa.
Námskeiðið gekk ótrúlega vel og á föstudeginum var haldin lítil útskriftarathöfn þar sem öll þau sem kláruðu námskeiðið fengu útskriftarskírteini og kynntu fyrir hópnum hugmyndirnar sínar og sum spiluðu hljóðbrot úr stúdíóinu.