Írlandsferð Gleðibankans og 100og1
Ungmenni úr feministaklúbbunum Vigdísi og Beljunni í félagsmiðstöðvunum Gleðibankanum og 100og1 skruppu í ungmennaskiptaferð til Írlands á dögunum þar sem þau hittu fyrir írsk ungmenni úr félagsmiðstöðinni Belvedere Youth Club í Dublin.
Markmið ferðarinnar var að kynnast félagsmiðstöðvastarfi þar og kynna sér leiðtogahæfni í gegnum hin ýmsu verkefni. Ásamt því að heimsækja Belvedere Youth Club fékk hópurinn tækifæri á að ferðast um Írland en hópurinn gisti meðal annars á sveitasetri með hestum, asna og hundum þar sem farið var í bogfimi, klifur, go kart, ratleik, hópefli og kveikt upp í varðeldi þar sem íslenski hópurinn söng íslensk dægurlög fyrir írska hópinn og það hástöfum.
Í Dublin heimsótti hópurinn meðal annars sýndarveruleikadeild háskólans í Dublin þar sem þau fengu tækifæri á að leysa alls kyns skemmtileg verkefni í gegnum sýndarveruleika.
Ferðin var virkilega vel heppnuð og hópurinn tróð sér vel út fyrir boxið og lærði í leiðinni alveg heilan helling. Þau komu reynslunni ríkari heim og voru alsæl með ferðina.