Unglingarnir hafa haft nógu að snúast í sumarstarfinu
Unglingarnir í félagsmiðstöðvum Tjarnarinnar hafa haft í nógu að snúast í sumarstarfinu. Félagsmiðstöðvarnar bjóða upp á fimm opnanir í viku víðsvegar um hverfið fyrir unglingana í sumar, ýmist á daginn eða kvöldin og skipulögðu unglingarnir sjálf dagskrá sumarsins.
Það sem af er sumri hafa unglingarnir meðal annars skellt sér í vatnsbyssustríð og Bubblubolta, sund, útileiki og kubb, grillað sykurpúða í Öskjuhlíð, farið í trampólíngarð, horft saman á HM og búið til sushi. Dagskráin framundan er svo ekki af verri endanum en unglingarnir stefna á að skemmta sér saman í leikjum í Hljómskálagarðinum, bæjarferð, lasertag, fáránleikum í Nauthólsvík og grillpartýi. Ekki nóg með það heldur fer senn að líða að hinni árlegu útilegu sem slær alltaf í gegn en skráning í hana er í fullum gangi á sumar.fristund.is
Félagsmiðstöðvarnar sendu dagskrá sumarsins á foreldra og forsjáraðila í gegnum Mentor í byrjun sumars. Einnig auglýsa félagsmiðstöðvarnar dagskrána beint til unglinganna daglega gegnum samfélagsmiðla í sumar og setja einnig reglulega upplýsingar inn á foreldrasíður félagsmiðstöðvanna á facebook. Endilega fylgist með!