Hugmyndasöfnun Hverfið mitt 2019

Nú fer að hefjast hugmyndasöfnun fyrir verkefnið Hverfið mitt. Hverfið mitt er samráðsverkefni íbúa og stjórnsýslu um forgangsröðun og úthlutun fjármagns til smærri nýframkvæmda og viðhaldsverkefna í hverfum borgarinnar.  Verkefnið felur í sér árlegar bindandi kosningar um nýframkvæmda- og viðhaldsverkefni sem íbúar setja inn á samráðsvefinn í hugmyndasöfnun sem fram fer í aðdraganda kosninga.

Þetta er í áttunda sinn sem Reykjavíkurborg efnir til hugmyndasöfnunar af þessu tagi og er framkvæmdafé 450 milljónir króna, sem er sama upphæð og var í fyrra. Verkefnum sem komast til framkvæmdar er m.a. ætlað að bæta hverfið á einhvern hátt og  færa hverfið nær framtíðarsýn íbúana, t.d. með snjöllum, heilsueflandi og barn- og aldursvænum lausnum.

Í ár er áhersla á að aukið samráð verði haft við hugmyndahöfunda í verkefninu á meðan hugmyndasöfnun og hugmyndamat í verkefninu stendur yfir. Haft verði samráð við ýmsa hópa og samtök í borginni um innsendingu hugmynda og hvatt til samstarfs um vinnslu hugmynda. Markmið þess er að skila vel útfærðum hugmyndum inn í hugmyndasöfnunina  í sátt við hugmyndahöfunda.

Þetta er frábær vettvangur fyrir ungt fólk til að koma hugmyndum sínum á framfæri og mögulega sjá þær verða að veruleika. Tilvalið verkefni til þess að fá krakkana (og fullorðna að sjálfsögðu) til að velta fyrir sér hvað og hvernig hægt er að hafa áhrif á sitt nærumhverfi. Allar hugmyndir sem sendar eru inn í hugmyndasöfnunina 20. mars – 9. apríl verða metnar og fá viðeigandi svar. Það geta allir sett inn hugmynd óháð aldri og búsetu.

Hugmyndasöfnunin fer í gang þann 20. mars og stendur til 9. apríl.
Einnig er hægt að fylgja Hverfið mitt á Twitter og Reykjavíkurborg á Instagram.