Fléttusamstarf í Vesturbæ, Miðborg og Hlíðum!

Það eru engir töfrar!

Í dag hittust fulltrúar frá grunnskólunum, félagsmiðstöðvunum, frístundamiðstöðinni, þjónustumiðstöðinni, foreldrafélögum og ungmennaráði í Vesturbæ, Miðborg og Hlíðum og ræddu um forvarnarmál. Margrét Lilja Guðmundsdóttir frá Rannsóknum og greiningum kynnti niðurstöður rannsókn síðasta árs á högum og líðan unglinga. Hún ræddi um mikilvægi þess að foreldrar væru upplýstir um þá þætti sem íslenska módelið hefur sýnt fram á að séu verndandi. Þeir þættir eru þátttaka í skipulögðu íþrótta- og tómstundastarfi, stuðningur, umhyggja og hlýja frá foreldrum, virkt eftirlit með hverjum og hvar unglingarnir eru og þeim tíma sem unglingar verja með foreldrum sínum. Þeir þættir sem eru áhættuþættir eru að eiga vini sem eru í neyslu, reykingar, tóbak, áfengi og ólögleg vímuefni og óskipulagðar athafnir eins og hangs og foreldralaus partý.

Eftir að Margrét lauk máli sínu tóku Andrea Marel deildarstjóri unglingastarfs í Tjörninni, Sigríður Arndís verkefnastjóri í þjónustumiðstöðinni og Arndís skólastjóri í Háteigsskóla til máls og sögðu frá verkfærum og viðbrögðum sem grunnskólar, félagsmiðstöðvar og þjónustumiðstöð hafa en þar er verið að vinna margþætt í þá átt að vernda unglinga.

Næst komu á fundinn fulltrúar ungmennaráðs Vesturbæjar, Miðborgar og Hlíða, þær Birna, Eva og Ágústa og ræddu um hvaða leiðir ungmennin sjá sem góða leið til að auka forvarnarvinnu og stemma stigu við áhættuhegðun. Þær nefndu meðal annars að kynna þyrftir betur fyrir unglingum hvert þeir geti komið áhyggjum sínum hafi þeir áhyggjur af vinum sínum og komu með tillögur að því að það væri opinn vettvangur nafnlausra ábendinga til fagaðila því það væri betra að eiga fúlan vin en dáinn vin. Það var virkilega áhrifaríkt á hlusta á þeirra tillögur.

Það lokum fór hvert skólahverfi í hópavinnu þar sem unnið var að því að leggja drög að aðgerðaráætlun á hverjum stað þar sem allir taka höndum saman um að styrkja forvarnir og vekja foreldra og forráðamenn til umhugsunar um þeirra mikilvæga hlutverk í lífi barna sinna.

Virkilega mikilvægt að samstarfsaðilar hittist og beri saman bækur sínar og fari samstíga í aðgerðir sem miða að því að bæta líf barna og unglinga í hverfinu.